بداية أحببت أن اقدم لكم قراءة في الأبراج للذين يحبون مطالعة الأبراج، لا تستغربوا لأنني قررت أن أكون متخصص في قراءة الأبراج ولو ليوم واحد. واذا اعجبتم قراءتي للأبراج سوف اقوم بفتح باب تفسير الأحلام وهاي شغله بسيطة.
قبل القراءة يجب التذكير بأن الأبراج كلها كذب بكذب
وللتذكير أيضا نقول
كذب المنجمون ولو صدقوا
تعالوا نبلش:
برج الحمل
وبالعامية يطلق عليه برج الهبايل قال ليش لأنه طيب وديع مسالم بحبش المشاكل أقسى كلمة ممكن يقولك اياها... بلاش ازعل منك الله يسامحك.
برج الثور
وبالعامية يطلق عليه برج التناحه لأن صاحبه تنح عنيد مشكلجي يعشق المداقرة بتقول له بدك عنب والا بدك تقاتل الناطور بجاوبك بدي أكسر راس الناطور وآكل عنب غصبة عنه.
برج الجوزاء
وبالعامية يطلق عليه برج المفاصيم بوجهك شكل وبقفاك شكل ثاني يعشقون الثرثرة والكلام على الناس وبعد ما يخلصوا بقولو شوا بدنا بسيرة الناس..حرام
برج السرطان
وبالعامية يطلق عليه برج الشبيحة قرصته والقبر يتمتع بمعرفة كبيرة كيف يوجع اللي قدامه.
برج الأسد
وبالعامية يطلق عليه برج الفياعة يعشق الظهور والمشاوير ونفسه يكون بيته عبارة عن سيارة بالشارع يحب التشحيط والتخميس.
برج العذراء
وبالعامية يطلق عليه برج العوانس لا يعجبه أو يعجبها العجب وبالآخر بيجوا على راسهم غز وبيكون شريك حياتهم عكس ما كانوا يحلمون.
برج الميزان
وبالعامية يطلق عليه برج التجار شعارهم الغش واللعب بالتسعيرات والضحك على الزباين قال إيش هاي البضاعة من فرنسا لعندي، وبتكون بضاعه صينية مغشوشة بتايوان.
برج العقرب
ويطلق عليه بالعاميه برج الشكيكة يعني بيلدغك شيك من غير رصيد بطير ضبان عقلك وهو ولا هو هون.
برج القوس
ويطلق عليه بالعامية برج الحبيبة قال يعني ولاد عم كيوبيد طول نهارهم عالمرايه والجل شغال على ودنه، وقت الدراسة...إنسى بلا شهادات بلا زفت.
برج الجدي
ويطلق عليه بالعاميه برج التيس .. ليش لأنه الجدي كبر وصار تيس أما بالنسبة للفهم يفتح الله مخه شغل ايده وهو اصلا صنايعي هامل.
برج الدلو
ويطلق عليه بالعاميه برج السطل .. قاضيها نوم ثم نوم وبالآخر بقوللك مش عارف ليش جسمي مكسر.. أحسن أرجع ارتاح وانام.
برج الحوت
ويطلق عليه بالعامية برج بتاع كله ما هو حوت وبالع الدنيا ولا فارقة معه افضل الأوقات عنده الساعة تسعة صباحا وقت ايداع النقود في البنك.
موضوع: برجك اليوم 
الأحد مايو 27, 2007 9:51 pm
